MIGASTU chuan kan lungawi lohna hrang hrang te hi kan sawrkarin min hriat nawn sakin hma min laksak thuai se kan duh a, Zoram mipuite pawhin min lo hriatsak turin kan ngen a ni, an ti bawk.

Tun sawrkar thar, cabinet meeting-in school upgradation order an revoke-na minute-ah school upgradation order an revoke rual hian proposal thar thehlut leh tura a inziah laiin, tun thleng hian cabinet meeting-ah school upgradation atan proposal thar thehluh a la ni lo hi a pawi kan ti a, a hma thei ang bera hma la turin sawrkar kan ngen a ni, an ti.

Kan dinhmun leh harsatna chungchangah hian Study Team min din sak tawh a, amaherawhchu study team te hian kan provincialise leh theihna turin hma an la lo niin kan hria a, keini Aided School-a thawktute min ngai pawimawh lovin min hmuhsitna niin kan hria a, a na kan ti, tiin an tarlang bawk.

Kan harsatna chungchangte sawipui tura kan Chief Minister berin kan pawl hruaitute vawiin thlenga a la hmu duh lo hi a pawi kan tiin a na kan ti takzet a ni, an ti.

Sawrkarin kan lungawi lohna te min hriatsaka kan harsatna min chin felsak thuai theih nan, Aided School-a thawktu zawng zawngten Dt. 28.8.2025 (Thursday) atangin mahni thawhna hmun theuhah badge dum bel tan vek tur a ni a; hemi ni atang vek hian mahni school-ah theuh flag dum zar vek bawk tur, an ti a. An hmalakna hian awmzia a la neih loh chuan district tinah kawng zawh runpui nei tura ruahmanna siam leh a ni ang, an ti bawk.

An dinhmun harsatzia leh hrehawmzia te hriatthiam saka hma  laksak thuai turin sawrkar an ngen a; Zoram mipuite pawhin min hriatthiampui se kan ti takzet, an ti bawk.